MGA LAGDA SA 2020 TIGI SA SINULATAY SA LUDABI-VALENCIA CITY

Litrato Kortesiya sa Bisaya Magasin May 09, 2018

Magpahigayon ang chapter sa Lubas sa Dagang Binisaya (LUBADI)- Dakbayan sa Valencia, Bukidnon og usa ka tigi-sinulatay, pinaagi sa pangulo sa LUDABI-Valencia, Emeterio Sumagang. Ang LUDABI ang usa sa mga bagang hugpong sa mga Bisayang adunay panglantaw para sa Binisaya nga kabilin, usa na niana ang Binisayang Katitikan. Ug sa pila ka tuig, sa personal nga kasinatian, taod-taod na nga walay nagpakabanang mag-initiate gikan sa LUDABI nga sa kanhiay aktibong nagpasiugdag tigi-sinulatay. 

Maong nindot ni nga timailhan dili lang para sa mga magsusulat apan para sa kinatibuk-ang Binisayang Katitikan. Ang mga sumusunod mao ang lagda para niining tuiga sa tigi-sinulatay sa LUDABI- Valencia:

1. Ang Tigi alang lamang sa tulo kategoriya: Sugilanon, Gumalaysay ug Balak nga bukas sa mga magsusulat nga nagagikan sa Luzon, Kabisay-an ug Mindanao;

2. Ang Tigi magsugod sa Oktubre 1, 2020 hangtod sa Nobiyembre 30, 2020. Ang mga ganti mao kining mosunod:

Unang Ganti : P 5,000

Ikaduhang Ganti : P 3,000

Ikatulong Ganti : P 2,000

3. Ang matag salmot nga  Sugilanon pito (7) ngadto sa napulo (10) ka panid; ang Gumalaysay, upat(4) ngadto sa unom (6) ka panid ug ang Balak dili molabaw sa duha ka panid.

4. Mahimong isalmot ang wala pa napatik ug napatik nga sugilanon ug balak.

5. Kinahanglan nga ang salmot nga sugilanon ug balak wala pa makadaog og dakong ganti (una, ikaduha o ikatlo nga ganti) sa bisan unsang tigi sa sinulatay ug ang magsusulat maghimo og “Panghimatuod” mahitungod niini;

6. Matag sumasalmot tugotan lamang og duha (2) ka tampo sa matag kategoriya;

7. Sa matag kategoriya, usa lamang ka ganti ang mahimong madaog sa matag magsusulat. Ang dakong puwesto/ganti lamang ang iyang maangkon;

8. Ang matag salmot kinahanglan nga makinilya o computer printout sa usa ka mubo nga bond paper (8 1/2” x 11”) sa tagurha ka lab-ang. Ang ngilit (margin) usa ka pulgada sa matag kilid. Himoon nga upat (4) ka kopya nga isulod sa taas nga sobre o brown envelope uban sa  “Panghimatuod” ;

9. Ang matag salmot nga sugilanon o balak kinahanglan nga Ulohan ra ang isulat;

10. Ang ulohan, ngalan sa tagsulat, adres, selpon namber ug pirma kinahanglan isulod sa gamayng sobre, takpan ug sinelyohan. Ang maong sobre sulatan lamang sa Ulohan ug Kategoriya;

11. Ang matag tampo dunay bayad (entry fee) nga P100 ug ang kinatibuk-an nga balayronon ipadala sa Cebuana o uban pang mga kuwarta-padala ngadto ni Emeterio S. Sumagang sa Valencia City, Bukidnon;

12. Ang LUDABI-VALENCIA CITY adunay katungod sa paghikling sa mga namatud-an nga nakalapas sa bisan hain niining mga lagda. Ang entry fee dili na ibalik sa tagsulat;

13. Ang hukom sa Hunta sa mga Maghuhukom pagailhong pinal ug dili na matuis;

14. Ang resulta sa Tigi ipahabilo sa Bulan sa Enero, 2021. Walay panagtapok nga himoon. Ang ganting salapi ipadala sa mga mananaog pinaagi sa kuwarta-padala. Digitalo soft copy nga mga “Sertipiko sa Pagdaog” ang ipadala ngadto sa mga mananaog.

15. Ang mga salmot adto ipadala/ipadangat sa LUDABI-VALENCIA CITY, c/o Emeterio S. Sumagang, CSCAVCI Office, Barangay Hall, Poblacion, Valencia City, Bukidnon.

Para sa mga dugang nga pangutana, puyde ninyo kining ipaabot kay Emeterio Sumagang sa emesumagangsr@yahoo.com o sa 09167770738.

(Gi-forward ni Marcelo Geocallo)