PAMAHAYAG SA HIMUGSO KOLEKTIBO KALABOT SA ANTI-TERROR BILL

Gikondena sa Himugso Kolektibo ang lakang sa rehimen ni Duterte sa pinaspasay ug pinugos nga pagpasar sa Anti-Terror Bill taliwala sa kaguliyang sa pandemikong COVID-19. Giratsada sa mga kongresistang maka-Duterte ang maong pamalaod para maghatag og dugang kahadlok ug kaguliyang, daw kulang pa ang gibating kabalaka sa katawhan sa hinay ug pa-inday-inday nga aksyon sa rehimen. 

Ubos sa Anti-Terror Bill, pwedeng dakpon ang maski kinsa pinaagi sa sugo sa Anti-Terrorist Council tungod lang sa suspetsa. Mapriso ka sulod sa 14 days ug puyde pang i-extend sulod sa 10 days. Sumatotal 24 days ka mapriso tungod lang sa usa ka pagduda. Sulod sa maong mga adlaw, daghang mahitabo sulod sa kustodiya sa mga pulis. Daghan nang mga kaso sa torture. Daghang mga kaso sa pagpapugos sa pag-angkon sa usa ka sala nga wala gibuhat. Daghang mga kaso sa pagpananom og ebidensya. Dili na ta ganahan makakita pa og dugang pang pagpang-atake sa tawhanong katungod pinaagi sa pag-institusyonalisa niining tanan ubos sa Anti-Terror Bill.

Gapakaaron-ingnon ang rehimen nga kunuhay nabalaka sila sa mga armadong grupo sa nasod pero sila mismo ang nag-abag niining mga grupoha aron malamposong maka-recruit ug makakabig og dugang mga miyembro. 

Kon matuod ang kabalaka sa rehimen sa mga terorista ug sa kapakananan sa mga tawong moapil sa ilang kausa, dili unta nila mahunahunaan ang pagparatsada sa ANTI-TERROR BILL kundili ang pagpalambo sa mga programag polisiya nga maghatag og economic security sa katawhan. National industrialization, genuine agrarian reform, pipila lang kini sa puydeng paspasan sa rehimen bisan pa sa unang tuig niini sa poder. Pero ang giatiman mao ang padayon nga pagsalig ug pagsandig sa mga imperyalistang mga nasod, pagpinig sa mga langyawng kapitalista, ug padayong pagpangutang nga nagbutang sa katawhan sa kagutom ug kapobrehon. Nabutang ang katawhan sa posisyon nga madala sa pagdani sa mga teroristang grupo o diba kaha mapugos sa pagsukbit og armas sa ilang mga abaga aron pagsukol sa gakutoyng tiyan. Way laing nag-unang terorista sa Pilipinas kondili ang estadong way laing gipanalipod ug gisiguro kondili ang ilang personal na interes ug interes sa ilang mga kumpadreng negosyangteg langyawng kapitalista.

Isip mga batan-on ug sumusubol nga magsusulat sa Iligan ug Mindanao, ang katungod sa gawasnon nga pamahayag ang usa sa daghang mga prinsipyong among ituboy ug panalipdan. Ubos sa Anti-Terror Bill, usa na ka terrorist act ang pagpadayag sa pagsupak ug dili pag-uyon sa mga polisiya sa goberyno. Kinahanglan guro nato dumdomon ug ipadumdom sa kadaghanan ang Article 3 (Bill of Rights) Section 4 sa Philippine Constitution nga nagkanayon:

“No law shall be passed abridging the freedom of speech, of expression, or of the press, or the right of the people peaceably to assemble and petition the government for redress of grievances.” 

Kausa ang Himugso Kolektibo sa uban pang mga grupo, institusyon, ug personahe diha sa pagkondena ug pagsupak sa Anti-Terror Bill nga usa ka matuod nga ehemplo sa STATE TERRORISM. Magpakabana! Mangilabot! Ug magmadasigon diha sa pagpanalipod sa tawhanong katungod ug sa kaugmaon sa nasod!

BATOKAN ANG ANTI-TERROR BILL!

JUNK TERROR BILL NOW! 

PANALIPDAN ANG TAWHANONG KATUNGOD!