Mga Pangitabo sa Ilegal ug Bayolenteng Pagdakop ug Intimidasyon sa #Iligan16 sa Kamot sa Iligan City Police Station 5

Dili nato kalimtan ang pagpang-abuso sa gahom sa Philippine National Police- Iligan City Police Station Five sa mga kritikal ug manggihunaunaong mga estudyanteng madasigon nga nagpadayag sa ilang pagsupak sa kontra-tawong ANTI-TERROR BILL. Kinahanglan managot silang Colonel Michael Pareja, City Police Director ug Major Allan Abalde, Police Station 5 Commander nga nahimong posible ang overpowered nga response sa maong insidente daw nag-responde sa usa ka teroristang pagpang-atake. Kon ang pagbitbit og mga kartolina ug pag-sang-at sa mga isyu usa na ka akta sa terorismo sa ilang panan-aw, mas naghatag og dakong hulga ang mga kapulisan sa demokratikong prinsipyong gibarogan ning atong nasod ug ginapanalipdan sa katawhan.

Mubong pahinumdom para kay Colonel Michael Pareja ug Major Allan Abalde, sa ilang mga gagmyang pulis, sa kapulisan sa Iligan ug sa tanang pulis ug buot mahimong pulis sa nasod: Dili ninyo matagamtan ang kalamposan ug maangkon ang garbo sa inyong pagkapulis, mga sulugoon sa katawhan, kon dili ang masa ug mga yanong Pilipino ang nasa inyong hunahuna ug kasingkasing kada inyong litokon ang inyong motto "To Serve and To Protect".

Para kay Colonel Michael Pareja ug Major Allan Abalde: Kinsa kahay inyong ginaserbisyohan ug ginaprotektahan dihang inyong giatake ang mga nagpakabanang magtutungha sa Iligan gamit ang inyong gahom ug pwersa? Angay na ninyong ikaulaw, nga luyo sa inyong mga titulong Colonel ug Major, mga estudyanteng ang hinagiban lang nga ilang gidala-dala mao ang lantip nga pangisip ug matuod nga gugma para sa nasod. Angay na ninyong ikaulaw nga luyo sa inyong "desenteng" uniporme, mangurog na inyong tuhod sa mga kritikal nga tingog ug baratohong kartolina.

 Photo Source: Kabataan Partylist- Northern Mindanao